Vieiros

Tras dúas horas de reunión entre o presidente do goberno vasco, Juan José Ibarretxe, e o presidente do goberno español, José Luis Rodríguez Zapatero, esta cuarta feira, o 'lehendakari' garantiu a "máxima" implicación das institucións vascas na defensa dos dereitos fundamentais dos cidadáns, aínda que matizou que "contra a violencia non vale todo".

Ibarretxe, subliñou a necesidade, "agora máis que nunca", da unidade entre partidos e de "acordos políticos" na loita contra a ETA, xa que actuar doutro xeito, sinalou, sería "entregarlles o leme e a xestión da axenda política".

En referencia á defensa dos dereitos fundamentais dos cidadáns, o presidente vasco advertiu de que esta materia "debe ser un espazo a compartir", e de que non se pode "misturar co debate político".

Lei de Partidos
Neste senso, Ibarretxe afirmou que "non vale todo" na loita contra a ETA. "Non estamos de acordo coa política de exclusión e coa aplicación da Lei de Partidos", sinalou, e amosou o seu desacordo cunha "política de dereitos humanos que non se contemple para todas as persoas".

Tamén, desbotou que "as vellas fórmulas do pasado", apoiadas polo PP e polo PSOE, sirvan para melloraren as relaciones entre Euskadi e o Estado español, e recordou que este acordo se fixo "en contra do nacionalismo institucional vasco".

"Intento honesto" de buscar a paz
O presidente de Euskadi asegurou que a sociedade vasca está "aborrecida" pola ruptura da tregua da ETA. Dixo que Zapatero liderou un "intento honesto" de buscar a paz, que "mereceu a pena", e que "o hai que tentar unha e mil veces".

Por outra banda, Ibarretxe recordou que "segue a haber un Estatuto", aprobado pola maioría no parlamento vasco -rexeitado no español-, que "segue a ser unha referencia absolutamente válida" para lograr un modelo e "unha relación amábel entre Euskadi e España".

Valoración do goberno español
Pola súa banda, fontes do goberno español, consultadas polos xornalistas tras a reunión, salientaron a decisión dos executivos español e vasco de cooperaren "con firmeza" ante a ameaza da ETA.

"A xuntanza demostra o clima de normalidade" que preside as relaciones entre ambos os dous gobernos, malia ás "diferenzas políticas", que son "lexítimas" e que se manifestan principalmente "no eido dos partidos".

O encontro entre Zapatero e Ibarretxe prodúcese no marco da rolda de contactos aberta polo presidente español tras o anuncio da ETA de romper a súa 'tregua indefinida'.