Vieiros

Os partidos nacionalistas vascos celebran este domingo de Pascua o Aberri Eguna, o Día da Patria, por vez primeira desde a reinstauración do goberno en Euskadi sen que un nacionalista vasco ocupe a Presidencia (Lehendakaritza).

O PNV elixiu de novo Bilbo para este día. Estaba previsto que o presidente do EBB (Executiva) do PNV, Iñigo Urkullu, fose o encargado de dar lectura a un manifesto en que aposta por materializar iniciativas para que o Estado respecte o sistema institucional "que emane da vontade do pobo vasco".

• Declaración do PNV: Agirre Lehendakariaren bidetik (en castelán)

O colectivo Independentistak, composto por cidadáns en favor da independencia, logrou unir a esquerda abertzale e a Eusko Alkartasuna (EA). O programa é similar ao que en anteriores edicións convocaba o Foro de Debate Nacional. Estaba previsto que dúas marchas partisen ao tempo desde Irún (Gipuzkoa) e Hendaia (Lapurdi) para confluír finalmente na ponte fronteiriza entre herrialdes.

• Declaración do colectivo (en éuscaro, castelán e francés)

• Seguimento en directo da xornada, na web de Independentistak

Aralar, formación da esquerda abertzale, decidiu non se unir a esta convocatoria, mais enviará unha delegación. O partido celebrou este sábado o Aberri Eguna de forma anticipada, en colaboración con Abertzaleen Batasuna e Iratzarri, no Iparraldeoa. Na súa declaración oficial aseguran que se "abre un camiño para a colaboración, a posta en marcha dun movemento soberanista, plural e non violento".

• Declaración de Aralar con motivo do Aberri Eguna (en castelán)